记得94年既美国，果时仲系小学4年级，睇既唯一一场比赛系决赛，仲系第二日睇重播，好似仲知道咗赛果了，第一次睇巴西，睇意大利，睇到世界杯，记得有班巴西佬系度做住抱仔既动作庆祝入球。

 

98年既法国，果时初二，夜波，多数时候都剩系睇精彩片段，入球，只有几场可以睇全场，唔系早场就系星期五六晚，最记得睇晒荷兰同阿根廷既8强，古华特既入波，葛迪奥卢比斯既追平，柏金临完场前既一控一射绝杀。果届仲有好多超级经典，巴西3:2险胜丹麦、劳特纳兄弟既最后演出，克罗地亚用远射射死德国，巴西同荷兰激情四射既2:2、都唔知支持边支好，最后既施丹神奇头锤同朗拿度既神秘“失踪”。果届既决赛我系睇直播既，不过支持既巴西输咗。

 

02年韩国同日本共同举办既世界杯，系最接近我地既世界杯，唔需要崖夜，不过果年，我地高三。我记得我地课室系有电视机既，不过就算系自修课都冇开，中国对哥斯达尼加既首场赛事，我地都系听到有人叫先开来睇下发生咩事，结果就系睇到孙继海既受伤同两个对方既入球。0:4输给巴西，0:3输给土耳其，再加肇俊哲既一脚中住，中国队结束咗第一次既世界杯之旅，唔知下一次仲要等几耐呢？记得施丹拖住只残脚系度奔跑，记得德国小组赛胜送沙特8个光蛋、高路斯转咗3个前空翻，记得巴蒂斯图塔同一班阿根廷人哭着出唔到线既场景，记得裁判将吃人参既韩国人送咗入4强，仲有巴西既3R进攻。我永远支持荷兰，因为告鲁夫、因为三剑侠、因为佢地崇尚既传统“全攻全受”，而我同样中意巴西同阿根廷、因为睇佢地踢波系一种享受，盘带、短传，技术就系佢地脚底，就好似系跳Samba同Tango咁，你会觉得，波就系应该咁踢既。所以巴西拿冠军，系对热爱足球人既美梦。

 

06年既德国，我想睇晒全步赛事，可能会系第一次，又系最后一次可以咁样做了。毕业了，冇课了，以后要做野肯定唔会咁做，所以先会想。其实都有几场冇睇到，第一日既厄瓜多尔对波兰，系第二日睇番全场录像，16强既英格兰对厄瓜多尔同埋葡萄牙对荷兰，因为果晚系毕业聚餐，饮到个头重到条颈几乎撑唔起咁济，一趴上床就再都睁唔开眼了。

 

睇晒既世界杯，记得既野就当然好多好多，特别系D以前从未见过既。3张黄牌先换一场红牌，我念都算前无古人、后无来者了，英国人波尔就创造历史；16张黄牌4张红牌，葡萄牙同荷兰都算打得灿烂了；一脚脚超变态远射，从第一场既拉姆、芬宁斯，到巴西对日本果场既祖连奴，再到季军战既舒云斯迪加，仲有阿根廷对墨西哥加时麦斯果脚“哇”到晕既远射，D波唔系外西到飞起，就系一D都唔转咁飘下飘下，做守门员见到D咁既波，真系哭都冇眼泪了，唔知addidas系咪转登设计只“团队之星”成咁既呢？仲有果D超级闷既比赛，今届D保守既打法简直多到离谱，好多球队都系打单前锋，越到后来就越系咁，英格兰、葡萄牙、意大利、法国，D比赛往往睇到就要训着咁济，但佢地就有3知入到4强，而巴西同阿根廷就一齐8强止步，真系冇晒瘾；因为D强队都入晒淘汰赛，所以成日都要讨论D宿命、历史、巧合，有D在延续、有D被打破；施丹既谢幕演出，竟然系头锤撞人拿红牌；......睇住意大利拿冠军，冇意外，冇兴奋，就剩系好似某样事情结束咁，而已。

 

呢次，好多时候都系系学校宿舍睇直播，成日都慢人几秒，有时仲成分钟添，经常听到出面D人系度大叫，但我就要等一阵先知道发生咩事。

 

晚晚都5点训，但今年NBA既Final就都系9点打，所以有几日训落3、4个钟又要爬起身睇波，都算系疯狂了。

 

仲有啊，决赛果晚都系温堡顿男单同女双既决赛，又见到费达拿对拿度，郑洁同晏紫又赢一个大满贯，好鬼死开心既事。

 

当所有比赛都结束，一切又回归正常，唔洗再天光先训，起身吃中午饭。有一堆CPA既书等住睇，8月或者9月入职。

 

生活在继续着。

职业生涯最后一场比赛，竟然系世界杯决赛，你话仲有咩可以讲啊。施丹，乜奖项都拿过晒了，完美既生涯了，点知...

 

两队防守好既球队，究竟有冇可能有波入呢？

 

估都估唔到咁早就入波了，马奴达抓住意大利后防一个唔觉意推波入禁区，马特拉斯过来补位撞到下佢只后脚，跌低，点球。施丹唔射保方右边了，一切个波，点知撞楣，弹落，再弹番出来，不过裁判睇得好清楚，个波已经入晒白界线，1:0，连法国总统希拉克都拍晒手掌了。意大利唔可以慢慢来了。

 

不过佢地好快就做出回应，派路既角球，马特拉斯力压维拉头锤啄入，将功赎罪。仲未完啊，又系角球，又系派路斩去果个位，卢卡东尼又顶赢了，不过中楣弹高，法国执番身彩了。意大利既任意球对于法国来讲真系顶唔住。而上半场意大利控球更多，法国多数系靠施丹同亨利既个人突破。

 

下半场特然法国又控番节奏，亨利既突破，施丹既中场控制，法国连续有几个近磅既攻势，可以佢地保守既打发，都冇乜人插入禁区捅意大利人一刀。意大利人就差唔多谢晒了，唯有班后防就仲系冇乜跌，唔给人入，就未输了。两队崖埋90分钟了，又加时了。

 

本来法国有机会系加时收工既，列比利禁区边一笃，可惜射斜，跟住施丹一波系中间传去右路，然后插入禁区，接沙奴尔传中头锤一批，保方单手一托救出，老人家既美梦给后生仔阻住咗了。

 

点知。镜头跟住个波去咗法国后场，但突然裁判走番去意大利后场，有个意大利人训咗系地下。慢镜头见到原来马特拉斯同施丹“交流”咗几句，唔知讲乜了，然后施丹就一头中落佢个心口度。主裁同边裁倾咗下，仲可以点啊，红牌。施丹，你最后一场比赛，咁样既比赛，咁传奇既人生，但你系咪唔想咁完美呢？

 

点球了。意大利12年前输给巴西成就咗巴治奥既忧郁，8年前迪比亚治奥既点球中楣成就咗最后既冠军法国，6年前查斯古特既金球将欧洲杯从意大利人手入面隔硬抢咗过来。不过今次，运气终于番到亚平宁半岛，或者系法国人要还债了。个个人都射入，唯独系查斯古特，就系6年前果个除衫既少年，一脚踢中横楣，弹落来压住白界线，弹出。哥路素最后一个抽入网顶，5:3，胜利属于意大利人。

 

送走悲伤既法国人，送走果个地中海既老人家，世界杯留咗给意大利人，佢地可以大唱《To Be Number One》了。

 

结束了，天光了，又可以训番觉了。

沉闷既上半场，闷到一班人走咗一半去训觉，或者打机，同上届土耳其对韩国果场激情四射都得比啊，三四名呢D荣誉比赛就唔洗踢得咁保守啊，放出来打咪好咯。

 

来了，下半场十来分钟，舒云斯迪加系左路拿住个波，带横去禁区顶，见葡萄牙班后卫唔埋来逼，拉弓一抽，个波又系好似祖连奴果个咁衡到几乎唔转咁济，列卡度已经向自己右手边移咗少少，特然见到个波飘番去左边，就系手顶入，1:0。过咗几分钟，又系舒云斯迪加系左路开罚球直接将个波劲抽入禁区，葡萄牙人××伸脚一撞弹入，送给东道主一个大礼，2:0。

 

开咗记录之后D人就踢得放得多了，两边都快打快既对攻，迪高既远射给简恩系近住扑出，C朗既30几码远射，又系果种飘球，简恩虽然已经失咗位，但仲系回身一扑救出，佢既水平都仲系好高既。德国呢个时候就梗系打反击嘎了，又系舒云斯迪加，又系左路拿波，又系带埋禁区顶，又系冇人mark下脚面一抽，个波十足头场芬宁斯果个咁样，外旋网侧入，3:0，一个舒云斯迪加就搞掂晒葡萄牙。尾段费高系右边出咗个质素好高既传中，朗奴高美斯鱼跃一顶搞掂简恩，3:1，呢咁精彩既半场波就完场了。

 

简恩最后一场国家队赛事，演出精彩，费高退役之战，一个助攻算系咁了，虽然可能冇施丹咁传奇，未知嘎。

 

季军既东道主，算系大出赛前预测了。不过季军系咪好事呢？从86开始既季军，除咗90既意大利，法国、瑞典、克罗地亚、土耳其，都会入唔到下一届世界杯既决赛周，咁德国，你又可唔可以打破呢个宿命呢？

两队各得一个黄金机会。上半场中段亨利系禁区入少少cup过卡瓦奴，卡瓦奴伸脚，掂到亨利，跌低，12码，施丹一抽搞掂。下半场C朗一脚任意球射埋龙门度，巴夫斯念住双手抱住个波，点知飘得制弹番出来，费高跟上头锤一顶，高出横梁。就系咁，法国1:0赢咗葡萄牙，同6年前既欧洲杯半决赛极其相似，除咗唔系加时入波。

 

两支风格相近既球队，都系欧洲拉丁派，打咗场唔精彩既比赛，睇到我又训着咗了。唯一比德意果场好既就系唔洗打加时，可以早D训。

 

 

“12码晋级被淘汰定律”仲继续住，不过“何辉波衫定律”就暂时失效，果晚佢咗葡萄牙件衫。

决赛值得期待吗？我连4强都冇睇既强烈欲望了。

两队都好谨慎，德国首先摆开防守阵式，意大利凭借个人技术系上半场大部分时间系甘住德国来打，但机会反而都系德国有威胁少少。下半场就调翻转，意大利班人既体力好似跌得几快，不过德国既攻坚水平都系唔得，简拿瓦路同马特拉斯水准演出，高路斯又再消失。0:0，加时。

 

精彩原来全部去晒加时度。开波都未够5分钟，意大利就应该可以买定去柏林既机票了。基拿颠奴系右路压入禁区，小禁区地线附近cup过波历克，突然左脚射番近柱，个波唔快，但列文已经移咗个身出去，贪到尽都掂唔到，点知个波中柱弹出，系龙门前边行咗一段都冇意大利人上到来执鸡，似乎系冇运了。2分钟后又来，派路角球被德国人顶出，森保达禁区顶一射，个波又打中条横楣，两次了，运气似乎企系德国人果边。

 

过咗115分钟了，仲系冇入波，唔通德国点球队又有得威？意大利90、94、98连续点球输给阿根廷、巴西、法国，如果真系射点球就唔点睇好了。

 

不过唔洗了，118分钟，派路系禁区顶接到德国人头锤解围出来既角球，打横带咗几步，一甘个波传入禁区给哥路素，佢顺势左脚一趟，远柱网侧入，列文又系连波皮都掂唔到，1:0。又系果个“伟大的意大利左后卫”，呢次黄生唔敢再大叫了。呢个时候入波，冇得追了。德国一压上番，意大利D反击就即刻来了，基拿颠奴前场拿波对住两个德国后卫，向住中间推咗两下突然反方向传入禁区，后插上既迪比阿路脚内侧一推，远住网上角入，2:0，完场了，裁判都唔补时了。德国人睇住就来有入决赛既机会了，然后系2分钟之内幻灭。

 

德国仲系赢唔到意大利，以前4次交手，两平两负，今次系多蒙特呢个佢地71年不败既场地，都仲系打破唔到宿命。

 

德国既“29岁核心定律”输咗给意大利既“狗年行大运”。

 

从98年开始，逢系点球晋级既球队，都过唔到下一轮。98既巴西（四强赢荷兰）、02既西班牙（16强赢爱尔兰）、韩国（8强赢西班牙）、今届既乌克兰（16强赢瑞士），唯一例外既系98年既法国，佢地就拿咗冠军。今日就加埋德国上去了。

 

仲有一支葡萄牙，会唔会仲系宿命呢？

又系8强战，又打少一个，又系有机会提早结束比赛，又要射点球，又...系了，输了，英格兰，好似98年咁

 

一场超级闷既比赛，两边都系度斗保守，驻重兵防守，最有威胁既进攻都系葡萄牙既门前混战，可惜就祖高尔同泰利都错失机会。

 

历史又来了，朗尼争抢之中一脚踩落卡瓦奴要害度，好了，红牌了，走吧，反正你“师兄”碧哥都坐咗系下面等紧你了。葡萄牙甘住打，但点解都系打得咁样衰啊，剩系识左右两边传来传去，个波都入唔到禁区，系临完场前先知要入波，冇计了，又点球。

原来精彩系点球既时候。林伯第一个上去就唔入了，英格兰0:1了，成班英格兰人好似已经输咗咁哭了。点知之后葡萄牙又中柱又射骗，而家就变番英格兰1:1，仲少射一波，到葡萄牙果边震了。唔洗腾，谢拉特同专登换上来射点球既加历查齐齐唔入，c朗最尾一脚趟右上角，3:1，葡萄牙入四强。

 

一班自己踢波既人番屋企了，终于走了，真系要支持你地唔容易啊。

阿根廷人比德国人技术更好，控制球更好，天赋更好，球迷更多，但德国赢咗，赢意志，赢心理素质，赢主场。

 

上班场阿根廷基本控制住比赛节奏，，但德国对列基美既防守令佢地既进攻组织得唔够好，而且迪维斯同基斯普既配合要比沙维奥拿差，反而德国既几个反击都比佢地既进攻近磅，但高路斯就基本隐形，快上快落之下平手进入下半场。

 

阿根廷本来应该赢得比赛，阿耶拉开波冇耐就接列基美既角球飞身顶入，1:0。点知领先之后既阿根廷就慢慢退到自己后场防守，中场既控制权主动让咗给德国，加埋后来列基美同基斯普换落场，阿根廷已经冇进攻咁济了，而德国既气势就上咗来。终于系80分钟，波历克左边传中，普度斯基头锤线后，高路斯系苏连之前一啄搞掂，追平。阿根廷为佢地既保守复出代价了，唔知比克文点睇呢？

 

加时都冇入波了，点球来了。一班大心脏既德国人，4波入晒，而阿耶拉同甘比阿素既点球就给列文扑出，5:3，德国晋级了。

 

球迷都中意水银泻地既进攻配合，不过比赛唔剩系技术高既就赢既，我撑阿根廷，我为佢地既出局惋惜，但德国值得赢波，特别系佢地既主场。

三个反越位成功，朗拿度、艾迪安奴、薛罗拔图各入一粒。加纳射门机会其实比巴西要多，不过唔系射给迪达就系打飞机，连门前2、3码既头锤都顶到落迪达只脚度，入唔到波真系自己把握机会既能力唔得。

 

虽然加纳控波多，但比赛既节奏基本上都系巴西控制，防守冇问题，攻出来想快想慢都得，两三个时机一塞就造就单刀机会，质素既分野决定咗比赛既胜负。

 

肥罗世界杯第15球，巴西世界杯总共入咗201球，卡富第19场世界杯赛事，卡路士参加既第100场巴西既胜仗，记录真习多啊。

 

 

为咗衬番世界杯，换首李克勤既《我着十号》，每届佢都会唱番只歌仔过喔

卢卡东尼几个决佳既机会，可惜佢始终入唔到自己既第一波。意大利凭住称高少少既实力同整体配合，虽然控球时间少过澳大利亚，但攻击威胁系大好多。基维尔同艾马顿一个受伤，一个停赛，对于澳大利亚既进攻影响都几大。

 

下半场一开波，马特拉斯禁区前面铲球犯规，裁判直接出红牌。呢波铲球既动作又唔系好茅，佢又唔系最后一个后卫，红牌似乎系太过了。打多一个既澳大利亚D进攻慢慢开始好番D了，但意大利条后防线始终保持稳定，反而D反击仲更近磅。

 

倒霉过后运气来了。补时最后一分钟，哥路素左路突破推入禁区，扭过澳大利亚后卫但被绊倒，点球。澳大利亚人都已经漠然了，托迪点球搞掂，然后就直接完场了。意大利系最后一刻，搭上8强既列车。

 

意大利既防守真系佢地最大既武器，如果卢卡东尼可以爆发，仲可以行得更远。

两场比赛都没有看，晚上回到宿舍我的颈已经不能再支撑那个足有千斤钟的头了，洗了个澡就爬上床了。虽然睡不好，但我已无法挣开眼皮。

 

16张黄牌4张红牌，荷兰你和葡萄牙也不用踢得这么难看吧，不知道为什么没上范尼，那件白色的球衣...真是太丑了，请马上将它丢进垃圾筒，我再也不想看到橙衣军团穿着这样的衣服打真么丑陋的比赛，请不要再侮辱荷兰足球。

 

碧咸入波，英格兰又1:0，或者这样才能拿冠军，只要艾历臣这么想就可以了。但我还看吗？

 

迪高停赛、科斯蒂尼停赛、C朗受伤，葡萄牙似乎处于绝对劣势，英格兰能晋级吗？

开波11分钟之内普多斯基连入两波，瑞典都未知咩事就已经落后两度波，之后德国仲系继续甘住瑞典打，瑞典已经崩溃咗了，D进攻好似系冇晒咁样。瑞典中坚卢锡两黄一红就出埋场，下半场开波本来有个点球可以追近既，点知拿臣就一脚飞机，冇得追了。

 

德国今场D进攻流畅到咩咁，瑞典班人又唔知去晒边，由得德国人拿波，猜波，射门多到成26下，波历克都有几脚，如果唔系伊萨臣D世界顶级扑救，瑞典都唔知要输几波番屋企了。

 

东道主开始发力了，下场对阿根廷就令人无限期待了。

本来仲念住突尼斯会好主动咁去攻乌克兰，因为佢地要出线就一定要赢，点知班波唔紧唔急咁样就打完全场，就算系下半场开波一段时间都仲系咁，又冇换D前锋入来搏既意愿，系到咗90分钟补时既时候先话好似系要尽地一煲咁，边仲有奇迹啊。

 

其实佢地可以话唔好彩既。上半场临完场前一个唔算严重既犯规，查斯利两黄一红罚落咗，10个打人11个。下半场有个罚球，乌克兰禾路连做人墙跳起唔知做乜举高只手，个波明显打到改变方向，但裁判冇判点球，唔知系佢睇唔到定觉得波打手了。之后舒夫真高就捉住突尼斯后卫回传守门员失误搏到个50/50既点球番来，自己亲自搞掂，1:0既乌克兰就晋级16强了。

 

20度既气温对乌克兰来讲好似已经系好热了，D球员既状态同上场对沙特差几远下，如果系咁大影响既话，下场比赛唔知会点了。

 

西班牙纯粹热身咁，上咗几个替补，上半场罚球头锤射入，1:0就算系有个交代了。

 

 

H组，西班牙第一，乌克兰第二，睇下边知会对法国了，又或者唔洗？

真高拿唔上得，巴路士岩岩伤愈，虽然赛前仲排小组第二，但可以预期加纳赢美国既机会好大，所以捷克要出线，就一定要赢意大利。冇得拣，摆大个头都要攻嘎了。

 

今届世界杯以来最令人关注既两场赛事，每一分钟都唔可以放松，而一场比赛既比分变化就直接影响令一场比赛既走势，因此我都开咗两个软件同时睇两场比赛。

 

捷克同意大利开波就搏锤，场面去得好快，冇前锋咁济既捷克差唔多每一脚射门都系尼维特既，威胁唔到保方，有攻势但制造唔到威胁。定D既意大利就打番佢地既反击，效果明显比捷克来得好。

 

22分钟加纳入波了，列纳既失误被加纳人强到射入埋。如果而家完场，捷克出局，加纳第一。4分钟之后意大利角球马特拉斯头锤一顶搞掂，1:0。捷克守唔住，要入两波，好难好难了。

 

不过希望系44分钟既时候又重燃番喔，美国入番一波，咁既话如果捷克可以入一粒，两边都打和，咁捷克就出线了。希望又翻番来了。

 

点知...2分钟之内，冇晒。捷克既普历克两黄变一红，10打11，同时果边加纳点球入波，再次领先。啊...

 

冇得念了，捷克下半场10个都要攻嘎了，但奇迹冇出现系佢地面前。恩沙基趁捷克后防少人既机会单刀过埋施治推入空门，2:0了，捷克冇了。

 

 

完了，捷克走了，尼维特走了，虽然知道佢地唔好彩，或者话唔够人劲，但送走捷克，就系唔舒服。

 

意大利第一，加纳第二，应该就会对巴西了。死亡e组，加纳克死咗捷克。

葡萄牙收埋一班正选，半支替补上来试阵。

 

又系早入波了，5分钟葡萄牙左路快速推进，横传入禁区，文尼治插上脚弓一趟网顶入。之后马昆斯防角球既时候举手掂到个波，点球，森米奥操刀搞掂，2:0了。估唔到咁快场上既形势就变成咁，墨西哥虽然输都有机会出线，但点知果边安哥拉会踢成点嘎。

 

咁墨西哥梗要攻了，3分钟后方辛卡就即刻接角球批入，追番一波。短时间咁追番一波对墨西哥系好有利既，追平既希望仲系好大。场上既形势又变得墨西哥慢慢压上，葡萄牙就乘机反击。

 

本身墨西哥可以追平嘎，下半场开波冇耐葡萄牙系禁区手球，点知巴拉禾一脚抄高，唔入。之后佩雷斯入咗禁区跌低，裁判话佢插水，两黄变一红，墨西哥打少一个。呢个时候安哥拉果边入波了，1:0赢紧伊朗。墨西哥D人开始阵了，如果按而家既比分完场，墨西哥会凭一个净胜球既优势出线，但仲有30分钟，自己又打少一个，点知跟住会点嘎。巴拉禾之后又有一个半单刀机会，点知佢又打飞机，如果出唔到线，就真系哭都冇眼泪了。

 

好彩上帝都冇玩墨西哥人。15分钟之后伊朗入番一波，知道消息既球迷即刻开心到唱晒歌跳晒舞。而场上两队仲系照旧对攻，快上快落直到临完场两边都知道出线已经定晒了，比赛就完了。

 

一场精彩既比赛，两边都打得好好。

 

D组打完，葡萄牙第一，墨西哥第二，但佢地要对住阿根廷或者荷兰，两队都开心唔到边度嘎了。

本来系争小组首名出线既比赛，起码南美同传统欧洲既对碰都算令人有所期待，但点知厄瓜多尔既出场名单雪藏咗几个绝对主力，包括前锋迪加度，明显就留力念住打英格兰（未知系咪可以唔输瑞典嘎）。

 

德国想赢，厄瓜多尔都“识做”，D逼抢好似隔靴搔痒咁冇来力度，德国可以轻松咁系前场控波猜波，加埋高路斯4分钟就入波，就更加唔急了，好似系度演练紧进攻套路咁。44分钟高路斯反越位推过埋门将打入自己第4球，下半场普多斯基打反击中路包抄撞射开斋，咁就3:0了。

 

呢场德国既进攻系打得最好既，中路，两边都好清晰，但因为对手既原因，对之后比赛既参考价值可能有限。不过德国从来都唔可以轻视，无论对手系边个。

 

下半场抽空一起睇埋波兰对哥斯达黎加果场，两边都算系为荣誉而战了，波兰2:1赢，不过呢3分来得迟咗D了。

 

德国小组第一，厄瓜多尔第二，阵间就可以知道佢地16强既对手系边队了。

瑞士同多哥都唔可以失分，所以一开场两队就搏锤了。比赛节奏攻防上落好快，但激烈有余精彩不足，两边既进攻都系有限公司，唔系互传落对方度，就系求奇一脚直传或者高波吊入禁区，尤其系下半场中后段，大家都急了，D波就乱咁飞了。

 

多哥既非洲式“推”进过唔到瑞士后卫，打到下半场就干脆两边吊波入禁区，打到好似英国波咁，瑞士D高大后卫就一波波顶番出来，冇威胁。本来上半场既时候多哥有几个可以入球既机会，可惜前锋把握机会既能力真系唔掂，加埋输少少运气，裁判睇唔到一个禁区犯规，输波都系实力不如人。

 

瑞士开波早段就入波，令到佢地始终处于一个比较主动既位置，可以等多哥攻出来再温机会打反击。下半场多哥后防既空位明显多咗，瑞士有几个反击既机会，可惜默契同技术既欠缺搞到D进攻唔可以流畅咁推进。

 

1:0完场既话，瑞士会因为入球少过韩国而处于相对劣势，所以佢地后来就不断咁换前锋上来冲，终于系临完场前把握一次反击机会入多一球，2:0就令佢地变番优势一方了。

 

呢组既变化都唔少，瑞士虽然话打平韩国就可以出线，但韩国既实力同精神意志都唔可以睇低，而法国究竟可唔可以赢到多哥两球以上，我念而家都冇人敢写包单，胜负可能就系一脚波。

日本克罗地亚两队应该都几熟了，大家好似都唔想入波，克罗地亚连点球都唔射入了，咁就0:0，一人拿一分咯，乜出线好有优势咩？

 

克罗地亚班人就好似冇乜意愿想一定要赢日本咁，D球员既精神状态都冇一种杀气。日本就可以从容咁猜下猜下波，不过日本体力真系唔点掂，下半场中段开始又已经开始掉晒链了，系克罗地亚自己唔争气先勉强唔洗失波。

 

两队想出线最后一轮都一定要赢，咁睇克罗地亚可能机会高少少了，都唔知距地想点

控制中场，厄瓜多尔控制住咗比赛既战局。两脚漂亮既传中，加一个精彩既边路小组配合，完成3个入球。反观哥斯达黎加除咗一波中楣外，冇任何有威胁既攻门，就算系禁区内既射门或软弱无力，或求其了事，踢埋下场就完成今次既德国旅行了。

 

而家厄瓜多尔有5个净胜球，压倒德国排系A组第一，咁最后一场德国唔赢唔得了，热切期待。